Pabor an nagkapirang senador na sa Agosto 4 na o sarong semana makalihis kan State of the Nation Address (SONA) ni Presidente Ferdinand Marcos Jr., puonan an impeachment trial kontra ki Vice President Sara Duterte.
Sigun ki Senador Joel Villanueva, nagkaiga nin informal talks o pag-urulay an nagkapirang senador kaibahan si Senate President Francis “Chiz” Escudero kun nuarin pwedeng mag-convene an Senado komo impeachment court.
Sierto soboot na hahaputon pa ni Escudero an mga senador mapadapit digde asin para ki Villanueva, kumporme ining puonan an paglilitis sarong semana makalihis an SONA kan Presidente.
Paliwanag kan senador, kaipuhan mapakarhay muna an saindang mga sadiri para sa pag-elehir nin lider kan 20th Congress, committee chairmanship, asin siring man an gigibuhon kan saindang counterpart sa Kamara.
Siring man, nilinaw ni Villanueva na mayo pang pinal na desisyon katakod kan prosopwesto alagad apat hasta anom na senador na an nagpahayag kan saindang pagtugot na sa Augusr 4 na mag-convene.
Marurumdumang nagluwas nin proposed calendar si Escudero pata sa nagdadangadang na impeachment proceedings kontra ki VP Sara.
Basado sa nasambitan ng kalendaryo, nakatalaan an panunumpa kan mga bagong elehir na senator-judges sa Hulyo 29, mantang mapuon man an paglilitis, kinaagahan, Hulyo 30.
Sigun ki Escudero, target kan Senado na masunod an iskedyul, asin huli ta igwang bastanteng oras an parehong kampo—an prosekusyon asin depensa tanganing magpreparar kun saen dae soboot papalampason an anuman na pagporbar na pagpapaluya sa proseso.
