Pig-enkaminar kan National Bureau of Investigation (NBI) an negosyanteng si Atong Ang na sumuko na sa mga awtoridad sa tahaw kan pinaigting pa na pagtugis sa saiya sa laog asin luwas kan Metro Manila.
Ini an kasunod kan inisyung arrest warrant kontra sa saiya kan Sta. Cruz Laguna Regional Trial Court (RTC) katakod kan 15 bilang kan kidnapping asin serious illegal detention asin apat na numero kan kidnapping with homicide dapit sa pagkawara asin paggadan kan mga sabungero.
Sa ngunyan, sigun ki NBI Acting Director Angelito Magno, mayo pang surrender feelers gikan ki Ang alagad enkaso sumuko si Ang mas marhay tanganing maparekas na mahiro an kaso.
Sinusugan man ini ninda Deputy Director for Operations Atty. Jose Justo Yap asin sinaysay na nagtatago na si Ang asin mayong planong sumuko.
Sa ibong kaini, pig-enkaminar pa man kan NBI official si Ang na sumuko na tanganing matawan man nin pagkakataong mapatotoohan na inosente ini, siring kan claim kan saiyang abogado.
Sigun pa ki Atty. Yap, pighagad an tabang kan mga team bako sana sa Manila kundi magin sa regional offices para iserbe an arrest warrant ki Ang. Pigsugo man an mga ini na paigtingon pa an saindang pagkalap nin impormasyon sa kinamomogtakan ni Ang asin tolos na iserbe an arrest warrant.
Sa ibong man kan hamon sa pag-arestar ki Ang huli na man sa hewas kan saiyang resources, pigsierto kan NBI official na dae sinda mauntok katuwang an iba pang law enforcement units hasta sa maarestar si Ang.
Sa ngunyan, dae pigsapubliko kan NBI an mga lokasyon kun saen pigsagibo an manhunt operation tanganing malikayan makompromiso an saindang operasyon alagad pira sa mga ini an mga address kun saen huring nanutaran an negosyanteng si Ang.
