NAGA CITY- Pigtawan duon kan sarong abogado na an ikukundusir na impeachment trial kan Senado kontra ki VP Sara Duterte an para sa pig-aapod na accountability kan mga public officials sa mga desisyon na saindang naginibo mantang nakatukaw sa posisyon.
Sa entrevista kan Bombo Radyo Naga ki Atty. Anne Chua, Civil and Criminal Lawyer, sa sarong law firm, sinaysay kaini na an nasambitan ng pagdangog an tanganing masimbagan asin maliwanagan an publiko sa mga piggagapo na kaso kontra sa Bise Presidente.
Marurumduman kaya na kan nakalihis na Disyembre 2024 igwang apat na impeachment case an pigsunad kontra ki VP Sara asin an grounds for impeachment an huli soboot sa graft and corruption, bribery, betrayal of public trust and other crimes.
Paliwanag pa ni Chua, kaipuhan na patotoohan sa trial an mga akusasyon na ini sa Bise Presidente asin madepensaran man ni Duterte an saiyang lado.
Mientrastanto, pigsaysay pa kan abogado na mayo man mangyayaring bloodbath sa impeachment trial nin huli ta bako man soboot ining sarong palabas kundi pagsunod sana sa proseso na nakabase sa konstitusyon.
Katakod digde, nagtutubod man si Chua na masusunod asin irerespeto an nakapalaog sa konstitusyon orog na ta saro man ining public trial.
Mientrastanto, pigpaliwanag man ni Chua na an Bise President an mayong immunity kontra sa pagpapatalsik sa pwesto asin ini an pigkokonsederar komo impeachable official.
Sa ngunyan, nasa kamot na soboot kan Senado kun an mga kaso na pigkakahampang kan Bise President an bastante tanganing dagusan na ining ma-impeach.
