Dae natitinag an Bureau of Fisheries and Aquatic Resources (BFAR) asin ipapadagos pa man an research mission sa West Philippine Sea (WPS) sa ibong kan mga agresibong aksiyon kan China Coast Guard (CCG).
Ini an pigtawan-duon ni BFAR Spokesperson Nazario Briguera kasunod kan pinakahuring pangha-harass kan barko kan China sa research vessel kan BFAR na BRP Datu Sanday kan nakalihis na 21 kun saen ginitgit asin binombahan ini nin duwang beses kan CCG vessel mantang nagsasagibo nin routine marine scientific research mission harani sa Sandy Cay.
Sigun sa opisyak, nakumpleto pa man kan BFAR vessel an mison kaini sa ibong kan natamong danyos sa kasagsagan kan water cannon incident.
Nilinaw man ni Briguera na nagtitinir na seaworthy an barko asin mapadagos pa man siring kan plano an mga operasyon kaini.
Sigun sa BFAR officials, kaibahan an BRP Datu Sanday sa nagpapadagos na marine scientific research initiative kan BFAR sa West Philippines tanganing mangolektar nin importanteng datos sa kondisyon man marince resources partikularmente na sa pinag-iiwalang cays.
