Mantang padagos na nananalasa an Typhoon Tino sa mga parte kan Katimugang Luzon, Visayas, asin Mindanao, tolos man na pigsugo kan Department of Energy (DOE) an Task Force on Energy Resiliency (TFER) katabang an National Inter-Agency Coordinating Cell (NIACC) tanganing magpreparar sa magigin epekto kaini.
Sigun sa Energy Department, pigpautob kan mga representate kan energy sector an pre-disaster risk assessments asin emergency response protocols tanganing maagapan an posibleng epekto kan bagyo asin masierto an tolos na pagbuwelta kan serbisyo kan kuryente asin suplay kan gasolina sa mga apektadong lugar.
Pigsaysay ni DOE Undersecretary Felix William B. Fuentebella kan Task Force on Energy Resiliency, nakikipag-koordinar na sinda sa mga power generators, transmission providers, distribution utilities, electric cooperatives, asin mga fuel suppliers tanganing masierto an marekas asin marhay na pagbubwelta kan serbisyo.
Padagos man an koordinasyon kan DOE sa National Grid Corporation of the Philippines (NGCP) na nakagprepar na an mga komunikasyon, kagamitan sa pagpapakarhay, asin mga lineman na nakaantabay sa mga lugar.
Tanganing masierto an energy security sa panahon kan bagyo, padagos na pig-monitor kan DOE an fuel supply chain asin nakikipag-tabangan sa mga industry partners tanganing masierto an bastante na imbentaryo para sa mga emergency services asin critical facilities.
Liwat man na nag-abiso an ahensiya sa publiko na tuyong igwang kalamidad mas marhay na nakapreparar an mga kaharongan kan emergency kit na igwang mga flashlight, baterya, inuman na tubig, asin pagkakan na dae madaling maraot.
