Nasa Jakarta, Indonesia na ngunyan si Presidente Ferdinand Marcos Jr. asin First Lady Liza Marcos tanganing mag-atendir sa inagurasyon ni President-elect kan Indonesia na si Prabowo Subianto asin Vice President-elect na si Gibran Rakabuming Raka.
Ngonian na aldaw, Oktubre 20, 2024, gigibohon an inagurasyon.
Kasbanggi nag-abot si Presidente Marcos Jr. sa Soekarno-Hatta International Airport sa Jakarta, Indonesia kaibahan an First Lady kun sain sinda sinabat ni Heneral (Ret.) Muhammad Tito Karnavian, Indonesia’s Minister of Home Affairs, kaiba an nagkapirang opisyales kan gobyerno kan Indonesia asin mga representante hale sa Philippine Embassy sa Indonesia.
An pagpasiring ni Presidente Marcos asin First Lady sa Indonesia base sa imbitasyon ni Indonesian President Joko Widodo.
Pigseselebrar man kan Pilipinas asin Indonesia an ika-75 taon kan formal diplomatic relations.
An presensya kan Presidente asin First Lady sa inagurasyon nagpapatunay giraray kan hararom na pagaamigo kan duwang nasyon.
Sa mga isinagibong exchange visit, orog na nagkukusog an bilateral relations sa pag-ulatan kan Pilipinas asin Indonesia.
