Pigsierto kan Department of Energy (DOE) na bastante pa man an suplay kan kuryente sa nasyon sa ibong kan panlalamasa kan Bagyong Opong (international name: Bualoi).
Basado sa report kan DOE, paramientras na isinarado an Units 1-3 kan BacMan Geothermal Power Plant sa Sorsogon asin Albay (133 MW), pati na an 28-MW Palayan Binary Plant sa Albay, komo paglikay.
Siring man, nagtitinir na operational an gabos kan manlaen-laen na on-grid power plants.Sa mga of-grid na lugar, nagkapirang diesel power plants sa irarom kan Small Power Utilities Group (SPUG) kan Napocor an limitado an oprasyon huli sa danyos.
Nakadeploy na man an mga restoration team, orog na sa mga lugar siring kan Camiguin Island sa Cagayan.Pigreport man kan National Grid Corporation of the Philippines (NGCP) na saro sa anom na naapektarang transmission line iyo an Amlan-Siaton 69kV Line sa Negros Oriental an naibweltada na an operasyon mantang lima pa digde an padagos na pigpapakarhay.
Sinaysay man kan DOE na 87 electric cooperatives sa 52 probinsya an namonitor, kun saen 16 an igwang partial interruptions asi 6 igwang total blackout – kadaklan an nasa Bicol, Eastern Visayas, asin Mimaropa.
Mientrastanto, nagtitinir na bastante an suplay kan langis sa bilog na nasyon.
Sampulong gasolinahan (9 sa Ilocos, 1 sa Central Luzon) an paramientras na nagsarado huli sa pagbaha o kawaran nin kuryente.
Sarong electric vehicle charging station man sa La Union an offline.
Mientrastanto, sigun sa Meralco poco mas o menos 8,900 na custome sa Quezon, Laguna, asin Cavite an mayo pa man kuryente hasta kasuodmang udto nin Biyernes, Setyembre 26.
