NAGA CITY – Nagpapautob ngunyan an Cararayan National High School nin shifting of classes asin blended learning huli sa kakulangan sa classroom.
Sa entrevista kan Bombo Radyo Naga ki Dr. Nemia Esguerra Luzada, Principal I kan nasambitan ng eskwelahan, sinaysay kaini na pag-aga an mga grade 7-9 an naglalaog. Mantang an mga panghapon man an nakakauli nin alas-7:15 na nin banggi na medyo delikado na orog na ta hararayo pa an harong kan iba sa sainda.
Dugang pa ni Luzada, enkaso kaya na dae sinda magpautob nin siring na mode of learning igwa sinda nin mga estudyante na mauli nin alas-8 o alas-9 na nin banggi.
Mientrastanto, padagos pa man na nag-aako nin enrollees an eskwelahan orog na an mga dati na nindang estudyante.
Igwa man nin nagkapirang transferee gikan sa mga Private schools kun sain an kadalasan na rason kan pagka delayed ninda sa pagpapa enroll an huli ta dae pa sinda nakakabayad kan saindang mga balance sa saindang mga dating eskwelahan.
Katakod kaini, pakiulay na sana kan opisyal sa mga magurang na tolos asikasuhon an mga credentials kan saindang mga aki antes pa man an first quarter exam huli ta dakula an magigin epekto kaini sa saindang pagklase.
Ini huli ta posibleng dae sinda matawan nin grado kun dae pa maiitao an kinakaipuhang papeles kan eskwelahan siring kan card asin iba pa orog na sa mga transfer students.
