NAGA CITY- Padagos na pigtutulod kan pamayuhan kan Barangay Igualdad, Naga City an saindang mga programa para sa sektor kan edukasyon.
Sa entrevista kan Bombo Radyo Naga ki Angelo Bendiola, Barangay Captain kan nasambitan ng lugar, sinaysay kaini na sa presente igwa soboot sindang duwang educare centers kun saen an saro sa mga ini an naibalyo naman sa sadiri kaining building.
Sigun sa opisyal, obheto soboot kan saindang lakdang na dae na maabala pa an mga kaakian enkaso igwang nagkakarawat nin basketball o kaya igwag mga events sa Barangay Hall.
Piglilikayan kan saindang lado na maperwisyo an pag-aadal kan mga ini asin matabangan an mga ini na makapokus sa saindang lesson.
Mientrastanto, pig-orgulyo man ni Bendiola an saindang pagbusol na mabuksan liwat an pathwalk gikan sa Sabang Elementary School pasiring sa Barangay Igualdad gate.
Sa paagi kaya kan programa na ini makakatabang na makatipid sa pamasahe an mga kaakian asin masisierto pa an kasalbaduhan kan gabos orog na ta igwang ibubugtak na outpost digde para sa mga barangay tanod.
Naglalaom soboot sinda na matatapos na an patrabaho digde tanganing magamit asin mapakinabangan naman kan mga saindang mga residentes partikular kan mga estudyante.
Sa ngunyan, pig-enkaminar na sana ni Bendiola an saiyang nasasakupan na padagos na makipag-koordinar sa saindang lado tanganing magin progresibo pa an saindang lugar.
