Pigbuyagyag ni Senator Risa Hontiveros an pagsuporta sa ginibo kan Kamara de Representantes na pagtapyas asin pagbalyo sa labing P1.3 billion na pondo kan Office of the Vice President para sa 2025.
Sigun ki Hontiveros, mas nakakamaray na ibalyo an nasambitan ng pondo sa Department of Health (DOH) asin Department of Social Welfare and Development (DSWD), an duwang ahensiya na igwa nin konkretong social asin health services.
Hurot pa kan Senador, posibleng magamit an nasambitan ng pondo sa pagpaparahay kang health asin social services sa Nasyon asin matabangan an mga pobre orog na an mga igwa nin pigmamate na medical condition.
Sigun pa ki Hontiveros, enkaso kakaipuhanon pagdebatehan na an pondo sa bicameral conference, saiya soboot ining susuportaran. Naglalaom man an Deputy Minority Leader na ma-atendir si VP Sara Duterte sa magigin pandangog sa budget.
Pirang aldaw antes ini pig-anunsyar kan Mababang Kapulungan an pinal na desisyon kaining tapyasan an budget kan OVP nin labing P1.3 billion kun saenlabi man na P646.5 million an ilalaog sa DSWD asin gagamiton sa iraraom kan Assistance to Individuals in Crisis Situation (AICS) program.
An kabanga kaini an pigtalaaan sa DOH asin gagamiton sa programa kaining Medical Assistance for Indigent and Financially Incapacitated Patients (MAIFIP).
Mientrastanto, katwiran kan mga kongresista, igwa soboot nin ‘overlapping’ sa programa kan OVP asin kan DOH asin DSWD kaya ma digde pigdara an nasambitan ng pondo.
