Nagpaalala ang Malacañang na hindi kailangan ng panic buying dahil sapat ang suplay ng gasolina at pangunahing bilihin sa bansa, ayon kay Palace Press Officer Atty. Claire Castro.
Sinabi ni Castro na ayon sa Department of Trade and Industry (DTI), walang paggalaw sa presyo ng mga pangunahing bilihin sa Metro Manila at iba pang rehiyon. Dagdag pa niya, ang anumang “abnormal” na pagtaas ng presyo ng produkto o petrolyo ay dapat agad i-report sa DTI at Department of Energy (DOE).
Binigyang-diin din ng Malacañang ang mahigpit na babala laban sa mga profiteer na maaaring samantalahin ang tensyon sa Gitnang Silangan, at tiniyak na susundin ng batas ang mga lumalabag.
Noong nakaraang linggo, tiniyak ni Pangulong Ferdinand “Bongbong” Marcos Jr. sa publiko na patuloy na minomonitor ng gobyerno ang presyo ng mga pangunahing bilihin habang inaasahang tataas ang presyo ng langis.
