Pigsaysay ni U.S. President Donald Trump kan Sabado na ilalaog kan Estados Unidos sa paramientras na kontrol kan Amerika an Venezuela makalihis soboot madakop si Venezuelan President Nicolas Maduro sa sarong secreat operation asin nakatalaan darahon sa New York tanganing hanapon an mga kasong may kinaaraman sa drug trafficking.
Pigbuyagyag pa ni Trump na malaog an mga darakulang kompanya kan langis gikan sa Estados Unidos sa Venezuela tanganing ayuson an malubhang napinsalang oil infrastructure kan nasyon, na may pinakadakulang reserba kan langis sa bilog na nasyon. Sigun sa mga eksperto, pupwedeng abuton nin pirang taon antes ganap na maibwelta an kapasidad kan sektor kan enerhiya kan Venezuela.
Siringman, binatikos kan nagkapirang kritiko an administrasyon dapit sa plano sa oil infrastructure kan Amerika sa Venezuela tanganing pagtakpan an operasyon kontra ki Maduro asin an serye kan missile strikes kontra sa soboot mga drug-smuggling boats na parte sana kan law enforcement effort para pugulan an paglaog kan ilegal na droga sa Estados Unidos.
Sigun ki Trump, an operasyon kan US Special Forces nagkawsa nin pagkawara kan kuryente sa pirang parte kan Caracas. Digde nadakop si Maduro harani sa saro sa saiyang pinagtataguan.
Pigsaysay man ni Trump na si Maduro asin an saiyang agom na si Cilia Flores pigdara muna sa sarong US Navy ship antes magpasiring sa Estados Unidos kan Sabado nin bangge (aldaw sa Amerika).
