Pigreport kan mga awtoridad sa Thailand na maabot sa 117 katawo an nawawara huli man sa mahewasang linog na nairehistro sa nasyon na Thailand, mantang lima katawo man an nagadan sa insidente.
Pig inkaminar kan gobernador kan Bangkok sa mga residente na magin kalmado mantang nagpapatanid sa mga posibleng aftershocks.
Napagaraman na an pagrasay kan establisyemento kawsa kan 7.7 magnitude na linog na tuminama sa Southeast Asia kan Biyernes, Marso 28, 2025, na nagkawsa nin mahiwas na danyos asin kagadanan sa nagkapirang nasyon, na an Myanmar asin Thailand kabali sa pinakaapektado.
Sa katakod pa na bareta sa Myanmar, 144 katawo man an gadan kabali na an pagrasay kan sarong moske sa banwaan nin Taungoo asin 730 an irido.
An linog nagkawsa man nin mahiwas na danyos sa mga syudad, kaiba an pagkaraot kan mga tulay, asin iba pang imprastraktura.
Mientrastanto, kinumpirmar kan United States Geological Survey (USGS) na nangyari an linog alas 12:30 nin hapon, na may epicenter na nasa 17 km gikan sa Mandalay, an ikaduwang pinakadakulang syudad sa Myanmar.
Mantang sinundan ini nin makusog na aftershock asin nagkapirang katamtaman na aftershocks, na nagkawsa man nin takot sa mga residente.
Nagdara man ini nin dakulang danyos, kabali an pagkaraot kan Ava Bridge sa ibabaw kan Salog Irrawaddy.
Nagdeklarar man nin state of emergency an MyanmaR para sa mga apektadong lugar asin an gobyerno nagpaplano na padalion an mga operasyon nin rescue asin humanitarian aid, alagad mayo pang detalyadong report sa mga nagadan asin danyos.
Nahahadit man an Red Cross International sa kamugtakan kan mga mayor na dam asin sa mahewasang danyos sa mga tinampo, tulay, asin mga establisyemento sa bilog na rehiyon.
