NAGA CITY- Nagbaba an numero kan malnourished na aki sa Barangay Igualdad, Naga City.
Sa entrevista kan Bombo Radyo Naga ki Angelo Bendiola, Barangay Kapitan kan nasambitan ng lugar, sinaysay kaini na sa presente saro na sana an malnourished na aki sa saindang barangay asin saro man na stunded.
Sigun sa opisyal, an pagbaba na ini kan numero sa laog nin sarong taon may 3 tolong bulan an huli sa padagos na feeding program, pakikipag-koordinar sa manlaen-laen na magkakanigong ahensiya siringman an padagos man na pagmonitor sa salud kan mga kaakian.
Nagtutubod soboot kaya an Kapitan na kun dae kayang mapakakan an bilog na komunidad puonan ini sa sarong tawo.
Sa paagi na ini, igwang sarong buhay an mababago na susunudan pa kan kadakol na mga kaakian.
Dugang pa ni Bendiola, dati nag-abot sa apat na malnourished asin 3 stunded na mga kaakian an saindang nairehistro alagad huli sa paglalapigot orog na kan Barangay Nutrition Council naabot ninda an saindang obheto na masimbagan an problema.
Mientrastanto, apwera sa feeding program igwa pa man ibang programa an Barangay Igualdad para sa mga kaakian siring kan libreng turi, check up asin iba pa na obhetong mapangatamanan an salud kan gabos na mga kaakian sa saindang lugar.
Sa ngunyan, pigsierto na sana kan opisyal na mapadagos an saindang magagayon na programa na makakatabang sa saindang nasasakupan.
