Pinahigot pa kan Philippine Coast Guard (PCG) an saindang presensiya sa Scarborough Shoal sa tahaw kan suspetsa na pagbubusol kan China na magtugdok nin national nature reserve sa pinag iiwalang kadagatan.
Ipinahiwatig ni PCG Commandant Admiral Ronnie Gil Gavan an posibleng reclamation activities kan China sa sarong entrevista mantang lunad kan BRP Gabriela Silang.
Sa ibong kaini, pighurot kan PCG official na dae ninda aabandunahon an nasambitan ng shoal asin imamantinir an dagos-dagos na presensiYa sa lugar tangani bantayan ini kontra sa anumang reclamation kan China.
Inihayag man kan Coast Guard Chief na matrayumpo na sinisiguro kan PCG na malaya pa man na makakadakop nin sira an mga Pilipinong parasisira sa pinag iiwalang kadagatan.
Marurumduman, inanunsyar kan China kan nakalihis na bulan sana an plano kaining magtatag nin Huangyan Island National Nature Reserve sa Scarborough Shoal, na nasa 125 nautical miles kanluran kan Zambales.
Alagad kan nakalihis sana na Biyernes, siniguro ni Armed Forces of the Philippines chief of staff Gen. Romeo Brawner Jr. na masusi nindang minamanmanan an mga aksiyon kan China sa Scarborough Shoal tangani malikyang mautro an nangyari sa Mischief o Panganiban Reef na nakubkob kan China asin dae naghaloy, nagtugdok nin militarized artificial island.
