Inako na kan Minority Bloc sa Senado an pagpili ki Senate President Sherwin Gatchalian.
Sa katunayan, nagkapirang miembros kan minorya kan Cayetano faction an nag-atendir sa sesyon kan Commission on Appointments (COA) asin sa sesyon kan Senado ngonian na hapon.
Sa special session ngonian na hapon, nagmanifesto si Senador Loren Legarda na si Senator Alan Peter Cayetano an magiging Senate Minority Floor Leader para maseguro an maray na paggibo kan mga trabaho kan bilog na Senado bilang sarong institusyon.
Pigbati man ni Legarda si Gatchalian sa saiyang pagkapili bilang Presidente kan Senado asin pig-omaw ini bilang sarong mahigos, dedikado, intelihenteng, asin disiplinadong serbidor publiko.
Si Senador Christopher “Bong” Go, sa ibong na lado, naglalaom na tapos na ngonian an kariribukan tanganing padagos sindang magtrabaho asin magserbi asin iprayoridad an interes kan namamanwaan Pilipino.
Kasabay ni Legarda si Senator Pia Cayetano na nag-atendir kan sesyon ngonian na hapon alagad kan hinapot kun suportado niya an bagong liderato, prangka siyang nagsimbag sa media na “common sense” ini asin 13 an mayoriya.
Hinapot si Senator Imee Marcos kun tapos na an kariribokan asin kun igwa pa siyang paglaom sa bagong liderato asin an simbag kan senator “dai kita naggigibo nin kariribokan”.
Mientrastanto, yaon man sa sesyon si Senator Camille Villar mantang nag-atendir man sa hearing asin COA session si Senador Rodante Marcoleta.
