Ibinunyag ni Prosecutor General Richard Anthony Fadullon na an kadaklan sa mga pamilya kan mga nawawarang sabungero dai na nakikipag-ugnayan sa Department of Justice.
Napansin ninda na paurag-urag nang nawawara an mga ‘complainants’ sa kaso asin tuluyang dai na nakikipag-ulay sa kagawaran.
Segun ki Prosecutor General Fadullon, sa kasong isinampa sa korte kan Sta. Cruz, Laguna, tulong ‘complainants’ an naipresentar alagad duwa sa sainda an naputol na an komunikasyon o dai na makontak.
Mantang an mga kaso man sa korte kan Lipa City, Batangas asin San Pablo, Laguna, dai na man nakikipag-ugnayan an mga pamilya kan biktima.
Ini sa ibong kan saindang pagprobar na makontak pa man giraray an mga ini alagad maski sa pribadong abogado kan mga ‘complainants’ dai na sinda nakikipag-ugnayan.
Minsan siring, segun ki Prosecutor General Richard Fadullon, igwa pa man giraray nin sarong pamilya an padagos na nakikipag-ugnayan sa Department of Justice.
Ini si Maria Carmelita Lasco, ina ni Missing Sabungero Ricardo ‘Jon’ Lasco, an nag-iisang nagdadanay matapos na ipresentar kan kagawaran kaugnay sa isinampang kaso.
Binigyang-duon kan opisyal na magpapadagos pa man giraray an kaso dawa pa mayo na o dai na nakikipag-ugnayan an pamilya kan mga biktima nin sabungero.
Dai nakadepende sa presensya kan mga kaapil an aspetong kriminal kan kaso huli ta mayo man daa an mga ini kan mawara an mga ‘missing sabungeros’.
Sa presente, padagos pa man giraray an mga kasong isinampa kan Department of Justice kontra sa mga imbuelto sa pagkawara kan mga sabungero.
