Nakaabot na sa labing 4,000 an nairehistrong kaso nin dengue sa syudad nin Maynila, susog sa pinakabagong datos kan Manila Health Department.
Base sa Epidemiology and Disease Surveillance System, nakaabot sa 4,048 an kaso nin dengue na nairehistro sa syudad poon Enero 1 sagkod Oktubre 19.
Apwera sa dengue, nakarehistro man an Maynila nin 28 bagong kaso nin influenza-like illness (ILI). Duwa sa mga ini an severe acute respiratory infection (SARI), mantang saro man an kaso nin leptospirosis.
Mientrastanto, mayong nairehistrong kaso nin cholera asin typhoid fever, siring man nin kumpirmadong kaso nin COVID-19.
Sa sarong facebook post ni Manila Mayor Isko Moreno, pig-aagda niya an mga Manileño na dai na paghalaton na magrabe an sintomas nin arin man na helang asin tulos na magpakonsulta sa eksperto tanganing matawan nin tulos na atensyong medikal.
