NAGA CITY- Pigpaliwanag kan sarong abogado an dapit sa nagin ruling kan Supreme Court sa pigbubusol na impeachment kontra ki Vice Presidente Sara Duterte.
Sa entrevista kan Bombo Radyo Naga ki Atty. Abelardo Quilaton Jr, Legal practitioner, CEO kan Quilaton Law Office, sinaysay kaini na sa nagin kasuguan kan Korte Suprema, an impeachment trial an dae mapadagos alagad dae boot sabihon na dae na pwedeng i-impeach an Bise-Presidente.
Sigun sa abogado an supreme court ruling an pig-a-apply sa specific na impeachment complaint na pig dismiss huli sa pig-aapod na legal constituional defect.
Alagad piglinaw ni Quilaton na pwede pa man giraray magsunad nin impeachment kontra ki VP Sara sa masunod na taon basta dae nababayolar an mga probisyon na nakapalaog sa konstitusyon.
Dugang pa kan abogado, an Korte Suprema an pwedeng mangiaram enkaso igwang nahiling na pang-aabuso o discretion kan kapangyarihan.
Mientrastanto, pigtawan duon man kaini na dae kayang baguhon kan Senado an kasuguan kan Supreme Court, pwede sana soboot sinda na magsunad kan saindang motion for reconsideration.
Sa ngunyan, kun hahaputon soboot ini kun bigo na an mga tawo na nagbubusol na madagos an impeachment trial kontra sa Bise Presidente an saiyang simbag dae pa nin huli ta pwede pa man giraray na magsunad nin impeachment basta nakakasunod sa mga legal na proseso.
