NAGA CITY – Pigkondusir ngunyan na aldaw an Basic Life Support training para sa mga personahes kan Philippine National Railway komo preparasyon sa posibleng expansion kan saindang byahe.
Sa nagin paghampang sa mga kagawad kan media ni Maria Leticia Baldonaza, HRMO II kan Philippine National Railway, sinaysay kaini na an nasambitan ng training an tanganing matukduan an gabos nindang miembros dapit sa tamang mga lakdang sa oras kan emerhensya na pupwedeng maeksperyensyahan mantang nagbabyahe an tren.
Tinawan duon man ni Baldonaza na igwa man sinda nin mga medical kits sa laog kan tren alagad importante na makanuod an saindang mga personahes kun paano ini gagamiton.
Igwa sinda nin nasa 34 na mga personahes na nakisumaro sa nasambitan ng event kaibahan na an gikan sa saindang engineering department; operations; rolling stocks and maintenance; dispensary units o clinic nurse asin admin.
Obheto man kan nasambitan ng programa an mas ma-improve pa an saindang serbisyo para sa saindang mga pasahero asin mamantinir na salbado an mga ini gikan sa manlaen-laeng insidente na pupwedeng mangyari mantang nagbabyahe an tren.
Sa ibong na lado, sigun naman ki John Benedict Carlos sarong Train Conductor, napakaimportante na igwa sinda nin kaaraman pag-abot sa pagsimbag sa emerhensya orog na kun mayo pa nin rescue tanganing makapagsalbar nin buhay kan saindang mga pasahero.
Nakapagtao man soboot nin kadakol na kaaraman saiya an pigkondusir nindang Basic Life Support training ngunyan na aldaw na magagamit ninda sa oras kan peligro.
