Ipinamalas kan China an mga makabagong armas kaini sa isinagibong military parade sa Tiananmen Square sa Beijing para Victory Day kan nasambitan ng nasyon komo pagkomemorar sa ika-80 anibersaryo kan pagwawakas kan World War II.
Kaibahan sa mga ipinadara an ginatos na makabagong weapons kan China siring kan laser weapons, nuclear ballistic missiles asin giant underwater drones.
Ibinida man an labi 10,000 tropang soldados kan China na nagpapahiling kan nagkukusog na military power kan China sa irarom kan pigbubusol ni Chinese President Xi Jinping na pagsasamoderno kan saindang pigkokonsiderar na “largest standing army” sa bilog na kinaban.
Sa pambihirang pagkakataon man, magkairiribahan na nagmartsa an tolong makapangyarihang lider na sinda North Korean leader Kim Jong Un asin Russian President Vladimir Putin kaibahan si Xi.
Ini an primerong pagkakataong nagkahilingan nin personal an tolong lider. Nag-atendir man sa nasambitan ng event an 24 na iba pang heads of state.
Sa saiyang speech, matapang na sinaysay ni Chinese President Xi na dae mapapugol an saindang nasyon asin dae matatakot sa mga bullies.
Mientrastanto, inakusaran man ni US President Donald Trump an China, Russia asin North Korea kan pagsasabwatan kontra sa Amerika.
