Pigsierto kan Department of Agriculture (DA) an nakapreparar na tabang para sa mga paraoma asin parasisira na naapektaran sa mahewasang pag-uran na kawsa kan bagyong Auring na dagusan man na nalusaw.
Sigun sa DA Disaster Risk Reduction Management Operations Center, naka-preposisyon an bastante na agricultural inputs na pwedeng iheras sa mga paraomang matutukoy na posibleng apektado.
Enot man na inabisuhan kan ahensiya an mga paraoma asin parasisira na magsagibo nin early harvest parehas sa mga pananom asin mga siraan kun kinakaipuhan, antes pa man an mga inilalaomang pag-uran na dara kan bagyo.
Susog sa DA DRRM Opearations Center, mapadagos an gigibuhon kaining pag-monitor sa sitwasyon kan mga parasisira asin paraoma, sa ibong kan dagusan na pagluya kan bagyong Auring asin padagos kaining pagluwas sa Philippine Area of Responsibility.
Nakabantay man an nasambitan ng opisina sa sitwasyon kan mga darakulang dam sa nasyon sa tahaw kan mahewasang pag-uran.
