NAGA CITY- Pigtawan duon kan pamayuhan kan Department of Education Camarines Sur an importansiya kan orientation na pigkukundusir kan Philippine Coast Guard pag-abot sa teritoryo kan nasyon partikular sa West Phillipine Sea.
Sa entrevista kan Bombo Radyo Naga ki Atty. Salvador Bogs Pelingon, Division Officer kan DepEd Camarines Sur, sinaysay kaini na kabali an Bicol Region sa mga dudumanan kan mga personahe gikan sa Philippine Coast Guard tanganing magtaong dugang na kaaraman dapit sa West Philippine Sea.
Sigun ki Pelingon, importante soboot ini tanganing mas malinawan pa an mga estudyante dapit sa pinag-iiriwalang parte kan kadagatan.
Dugang pa kan opisyal, mas marhay na an mga personahe gikan sa PCG an matukar dapit sa topic o isyu na ini tanganing mas magin hararom an pagkasabot na makukua kan mga kaakian.
Paliwanag pa ni Pelingon na nasa elementarya pa sana an mga estudyante pinag-aadalan na an dapit sa Philippine territory kun kaya dapat na magkaigwa nin mas pusog asin hararom na pagkasabot an mga jovenes sa napapanahon na isyu na kinakahampang kan nasyon orog sa usapin kan teritoryo.
Sa ngunyan, mayo pa soboot pinal na petsa an nasambitan ng orientation alagad naglalaom sinda na madadagos ini sa orog na marekas na panahon.
