Nagpatanid an Department of Education (DepEd) kontra sa pagpaluwas nin mga pekeng anunsyo gamit an social media.
Kabali digdi an mga pekeng anunsyo dapit sa cash assistance, suspension kan klase, scholarship program, asin no-backpack policy.
Enot na nakaabot sa atensyon kan Department of Education an nasambitan ng impormasyon, na sarong bagay na pinagkahaditan kan departamento huli sa posibleng epekto kaini sa mga estudyante asin mga magurang na posibleng maloko kan mga pekeng anunsyo.
Huli kaini, nagpaluwas nin patanid an DepEd asin nagpagirumdom sa publiko na dae basta-basta magtubod sa mga anunsyo na nagluluwas sa social media.
Sigun sa ahensya, an gabos na opisyal na anunsyo asin impormasyon na igwa nin kinaaraman sa basic education ipapaluwas sana kan DepEd Philippines, an official social media page kan DepEd.
Pwede man na kumpirmaron kan mga paratukdo o school management kun tama an impormasyon na nababasa sa social media.
Antes magpuon an klase ngunyan na bulan, enot nang nagluwas an sarong pekeng anunsyo na madudugangan na nin Grade 13 sa Senior High School, na tulos mang pinahimutikan kan departamento.
