Pigpahimutikan ni Foreign Affairs Secretary Enrique Manalo an pagdududa na sarong kasunduan kan Pilipinas asin China an pag-hali kan barkong BRP Teresa Magbanua kan Philippine Coast Guard (PCG) gikan sa Escoda Shoal.
Nagluwas an siring na hinala huli ta an paghali kan BRP Teresa Magbanua sa dagat asin pagbwelta sa port kan Palawan kan nakalihis na September 15 an timing sa katatapos pa sana na meeting sa Beijing kan bilateral consultation mechanism na pig-atenderan kan haralangkaw na opisyal kan duwang nasyon kan nakalihis na September 11.
Pigsimbag man ni Manalo sa budget hearing kan Department of Foreign Affairs (DFA) sa Senado na coincidence o nagkataon sana ini.Paliwanag ni Manalo, an nangyaring meeting an pag-urulay para sa mga isyu kan Pilipinas asin China dapit sa West Philippine Sea (WPS) asin parehas nagtutulod kan saindang kanya-kanyang paninindugan an duwang nasyon alagad mayo pang kasunduan sa pag-hali nin barko kan nasyon.
Ngunyan na weekend, pasiring an sekretaryo sa New York tanganing mag-atender sa ika-79 na United Nations General Assembly (UNGA) asin pupurbaran ni Manalo na maghagad nin suporta sa manlaen-laen na nasyon para sa kandidatura kan Pilipinas komo non-permanent member kan United Nations Security Council sa 2027 hasta 2028.
