Nagsagibo nin paenot na geological survey an Department of Energy (DOE) sa mga piling lugar sa Zambales asin Pangasina komo pagpreparar sa primerong eksplorasyon kan native o natural hydrogen sa nasyon.
An lakdang an kaakibat kan piglalaomang pagpirma ni Presidente Ferdinand Marcos Jr. sa mga enot na service contracts para sa bagong klase kan malinig na enerhiya.
Sakop kan survey an mga lugar na parte kan 2024 Philippine Energy Bid Round, asin obheto kaining makalikom nin primerong datos mapadapit sa geological asin environmental data tanganing magiyahan an mga masunod na kontraktor.
Kaibahan pa sa mga sinuring lugar an Mangatarem Hot Spring sa Pangasinan, siring man an Botolan Hot Spring asin Nagsasa Seeps sa Zambales—mga lugar na igwang potensyal sa natural hydrogen basado sa presensya kan hot springs asin ophiolitic rock formations.
Napag-araman man na an field assessments an isinagibo kaiba an Mines and Geosciences Bureau Region 3, lokal na gobyerno, asin Municipal Environment and Natural Resources Offices.
Dugang pa digde, parte man kan pagpreparar kan DOE para sa enot na training program sa nasyon an mapadapit sa native hydrogen exploration na gaganapon ngunyan na taon sa mga local asin international experts.
Pigsusuportaran man kan survey an padagos na pananaliksik kan Philippine Nuclear Research Institute (PNRI), na nakatuklas kan pinakadakulang natural hydrogen seep sa banwaan kan San Antonio, Zambales.Sa Nagsasa seep pa sana, labi 800 tonelada na kan natural hydrogen kada taon an nagluluwas, asin igwang posibilidad pang igwang reserba sa irarom kan daga.
