NAGA CITY- Pigpagirumdoman kan Department of Health an publiko manunungod sa mga helang na pupwedeng makua ngunyang pormal nang pigdeklarar an tag-uran sa Pilipinas.
Sigun ki Department of Health Asisstant Secretary Albert Domingo, pira sa mga ini an dengue, leptospirosis, waterborne diseases, asin influenza-like illness.
Basado sa nakaaging datos, saro an dengue sa mga helang na nauuso huli ta ini nakukua sa mga pigiistaran nin lamok orog na ngunyan na tag-uran. Mantang nakakadanyos man an influenza-like illness asin pupwede ining maglakop sa paagi nin mga airborne particles o pakikisalamuha kan mga tawo, orog na sa mga madalas na pagtiripon.
Kaya man pig-eenkaminar kan Department of Health an mga Pilipino na mag doble ingat pag-abot sa kinakakan asin iniinom asin siertuhong dai ini kontaminado.
Pigpayuhan man an mga Pilipino na ugaliong maghugas nin kamot, likayan an paglusong sa baha, magsulot nin facemask, siring man an paglilinig asin pagsisierto na mayong anumang gamit na pupwedeng mapano nin tubig asin istaran nin lamok.
Mientrastanto padagos man an pag antabay asin pagpepreparar kan nasambitang ahensya alagad pigpayuhan man ninda liwat an publiko na dai magin kampante tanganing masierto an saindang kasalbaduhan.
