Pigbatikos kan Kilusang Magbubukid ng Pilipinas (KMP) an desisyon kan Department of Agriculture (DA) na mag-angkat nin sibulyas sa katahawan kan harvest season.
Sigun ki KMP chairperson Danilo Ramos, huli sa padagos na naglalaom an gobierno sa importasyon komo sarong band-aid solution, dae napupugolan an paglobo kan presyo kan mga agricultural products sa nasyon.
Duon ni Ramos, an panibagong pag-angkat nin sibulyas mantang nasa katahawan kan anihan an sierto na mapalugi sa mga magsisibulyas alagad mapabor sa pipirang importer. Pighalimbawa kan grupo an nangyari kan 2022 kun saen nagpakol sa labi P700 an kada kilong presyo kan sibulyas.
Sigun sa grupo, an 2022 onion crisis an resulta kan cartel manipulation asin kabiguan kan gobierno na pugolan ann pagtatago kan supply, orog na gikan sa mga importer.
Sigun man sa Fedaration of Free Farmers, mayo sa timing an desisyon kan kagawaran. Duon pa kan grupo, nagpuon na an anihan kan sibulyas sa mga pangenot na tanoman sa nasyon siring kan Pangasinan, Occidental Mindoro, asin Nueva Ecija, asin an ribo-ribong tonelada kan sibulyas na aangkaton an sierto na makaka-apektar sa farmgate price kan sibulyas, bagay na orog na ikakalugi kan mga paraoma.
Rason kan grupo, nahahampang na an mga paraoma sa halangkaw na presyo kan mga farm inputs, kaiba na an panlalamasa kan mga harabas o army worms.
Antes kaini, pig-aprubaran kan liderato kan DA an pag-angkat sa apat na ribong metriko tonelada kan sibulyas.
