NAGA CITY- Pigkomemorar sa siyudad nin Naga an ika-treseng Death Anniversary ni dating Naga City Mayor asin dating DILG Secretary Jesse M. Robredo.
An nasambitan ng komemorasyon an pinangenotan kan saiyang agom asin ngunyan an alkalde kan siyudad nin Naga na si Mayor Leni Robredo kaibahan an saiyang duwang aki.
Sa nagin patara-tara ni Naga City Mayor Leni Robredo, nagpa-abot ini nin pasasalamat sa gabos sa taon-taon na pagselebrar asin pagrumdom bako sana sa nagibuhan ni Jesse para sa siyudad kundi an pagtaong importansiya sa saiyang bilog na pagkatawo.
Dae soboot matatawaran an pagpapadangat na ipinapahiling kan bilog na Naga City maski 13 taon naman makalihis na magtalikod sa kinaban si Jesse.
Nagtitinir na nakatatak sa puso asin isip kan mga Nagueño an legasiya, marhay na paggogobernar asin dedikasyon na ipinahiling ni Jesse kan ini an nabubuhay pa.
Mientrastanto, katakod digde, nagkaigwa man nin Wreath-Laying Ceremony & Community Flower Offering na pigkundusir sa City Hall Grounds siringman an pagkakaigwa nin banal na Santa Misa.
Apwera digde, kasubagong pagkahapon man, pigkundusir an mga aktibidad siring kan pag-introdusir kan Naga City Citizen’s Charter 2.0 asin an opisyal na paglunsar kan myNAGA app.
