Pigsierto kan Department of Migrant Workers na papanimbagon ninda an mga madadakop pang mga illegal recruiters na padagos sa pambibiktima nin mga Pilipinong mawot kuta na makakua nin trabaho abroad.
Nakapreparar soboot an nasambitan ng ahensya na dakupon an mga mamo-monitor nindang nag-aalok nin mga trabaho pasiring sa ibang nasyon na kadaklan nahihiling online.
Ini an kasunod kan saindang pagsalakay sa mga establisyemento sa sarong learning center na imbwelto sa illegal na pagpapadara nin mga obrero particular sa nasyon na Japan.
Huli man digde, mahigot na pigsaysay ni Secretary Hans Leo Cacdac kan Department of Migrant Workers an aatubangon na kasong kriminal kan mga mabibistong nagsasagibo nin bakong ligal na operasyon.
Dati nang gibuhon soboot kan naipasaradong learning center na pagbayadon muna nin nagkakantidad na 40,000 pesos an aplikante para sa training fee kaini asin saka isusunod na i-rerefer sa saro namang recruitment agency.
Kaya man, nagkaigwa nin paglilinaw dapit digde si Undersecretary Patrica Yvonne Caunan.
Dugang pa kaini, dae dapat magbayad an sarong aplikante o empleyado nin huli ta mismong employer na an nakatalaan na mag-asikaso pati sa mga language training na kakaipuhan kaini.
Sa ngunyan, nagpapadagos pa an pagmamatyag kan kagawaran sa pagsugpo nin mga manlolokong ilegal na nag-aalok nin trabaho abroad.
