NAGA CITY – Pigkundusir an Kalusugang Makabata One-Stop Health Caravan kasabay kan pagselebrar kan National Children’s Month sa siyudad nin Naga.
Sa nagin paghampang sa mga kagawad kan media ni Naga City Focal Person, Elmer Baldemoro pigsaysay kaini na an nasambitan ng caravan sarong programa para sa mga kaakian.
Katakod digde, kabali soboot sa pigtatangro na services kan caravan iyo an medical check-up asin an mga doctor an gikan sa Naga City Hospital asin Naga City Health Office siringman igwa man libreng bulong asin vitamins na pigtatao katabang an Nutrition counseling kan City Nutrition and Population Office asin man an dental check-up kan Dental division kan City Office.
Dugang pa ni Baldemoro na importante soboot na maaraman an health, nutrition asin dental status kan mga aki tanganing sa murang edad mahiling na an status kaini orog na sa estado kan ngipon huli ta ini an saro sa kawsa kan malnutrisyon.
Dugang pa kan opisyal, katabang sa nasambitan ng caravan an Naga City General Hospital Office.
Sigun pa ki Baldemoro na mayo soboot ining piglilimitr manungod sa edad kan mga kaakian na pwedeng mag avail kan Caravan alagad kun manunutaran an mga rayaon nage-edad na 7-anyos pababa huli man ta an ibang mga kaakian nasa eskwelahan.
Mientrastanto, igwa pang masunod na aktibidad an nasambitan ng siyudad siringkan pagtao nin school supplies sa mga educare center huli man ta kadaklan kaini binaha asin nangangaipuhan nin supplies.
Pigtawan-duon pa man kan opisyal an gigibuhon na culminating activity manungod sa State of the Children report sa Nobyembre 29, 2024 na gigibuhon ni Naga City Mayor Nelson Legacion tanganing maipa-abot an mga programa asin mga proyekto kan lokal na gobyerno kan nasambitan ng siyudad.
