NAGA CITY – Labi sa 100 katao an paramientras na inibakwar makalihis an nangyaring bakbakan sa pagultanan kan Philippine Army asin mga rebeldeng New People’s Army (NPA) sa Barangay Lidong, Caramoan, Camarines Sur kasuudma.
Sa nakuang impormasyon kan Bombo Radyo Naga gikan sa Provincial Disaster Risk Reduction and Management Council (PDRRMC), napag-araman na nasa 161 katao an nagtinir muna sa covered court kan LGU-Garchitorena.
Katakod kaini tulos man na inalerto kan Department of Social Welfare and Development Office (DSWD) an saindang Quick Response Team (QRT) para sa pagresponde sa mga pangangaipo kan mga evacuees.
Apwera digdi, preparado naman soboot an mga ospital sa nasambitan ng banwaan para sa medical assistance mantang sisimbagon man kan Philippine Red Cross Camarines Sur an psychosocial services para sa mga epektadong residente.
Kung marurumduman, naghaloy nin haros 1 1/2 oras an nagin bakbakan kan tropa kan gobyerno asin mga rebelde kunsaen sinabayan na ini kan close air support kan Philippine Airforce.
Sa entrevista ki Maj. Ricky Anthony Aguilar, Chief kan Division Public Affairs Office kan 9th Infantry Division Philippine Army, sinaysay kaini na mayong nairehistrong casualty sa parte kan tropa kan gobyerno alagad pigtutubudang dakol an nairidu sa mga rebelde huli sa mga tagdu nin dugo na nawalat saencounter site.
Mientrastanto, apwera sa nasambitan ng engkwentro saro pang bakbakan an nairehistro sa Barangay Itangon, Bula kunsaen kinakarkulong nasa 30 miyembro man kan mga NPA an nakabakbakan kan mga militar.
Naghaloy man nin 30 minuto an riribayan nin putok na nag resulta sa pagkakarekober sa tolong backpacks asin nagkapirang subersibong dokumento.
