NAGA CITY – Pigkondusir ngunyan na aldaw an Rice Soy feeding program kan Rise against hunger kan Angat Buhay Foundation sa Concepcion Grande, Naga City.
Sa entrevista kan Bombo Radyo Naga ki Jerold Rito, kapitan kan nasambitan ng barangay sinaysay kaini apwera sa sa saindang barangay nakaibahan man ninda sa aktibidad an Barangay Mabolo, Concepcion Pequeña, asin Sabang.
Obheto kan nasambitan ng programa an mapuho na an malnutrisyon sa lambang barangay sa syudad nin Naga, kun sain an target kaini na matawan an mga identified na malnourished sa lambang barangay.
Sa saindang banwaan igwa sinda nin nasa 59 na kaakian na target na matawan kan rice soy tanganing mapakarhay an kamugtakan kan salud kan mga ini.
Labi man an pasasalamat kan opisyal huli ta sa saindang barangay pigkondusir an launching kan nasambitan ng aktibidad orog na ta dakula man soboot an dadarahon kaining tabang sa saindang mga residentes.
Sa ibong na lado, sigun naman ki Claire Oas, volunteer worker service point officer kan Bagumbayan Sur, Naga City na magayon na programa an feeding program huli ta dakula an epekto kan pagigin malnourished kan sarong aki sa saindang development asin pagkanuod.
Labi man an saiyang kaogmahan na magin parte kan nasambitan ng aktibidad ngunyan na aldaw asin makatabang sa mga aki na nangangaipuhan.
