Kokonsultahon kan Land Transportation Franchising and Regulatory Board (LTFRB) an publiko para sa hirit na langkaw pamasahe puon sa masunod na semana.
Ini an sa tahaw kan magkakasunod na semanang pagsipa kan presyo kan mga produktong petrolyo.
Sigun sa ahensiya, an padagos na paglangkaw kan presyo kan langis asin importansiya kan maintenance kan behikulo an nagdara sa mga gupo ka transportasyon na magsunad kan saindang petisyon para sa umento sa minimum fare hike.
Sa sarong statemen, sinaysay ni LTFRB chairperson Atty. Vigor Mendoza III na madaraos sinda nin duwang pagdangog sa masunod na semana tanganing pag-ulayan an gabos kan mga isyung nagpapatos sa mga pighihirit na fare hike.
Basado sa mga petisyon, pighahagad kan transport group an dugang na P2 sa minimum fare, gibuhong P15 an minimum fare para sa traditional jeepneys asin P15 hasta P17 para sa modern jeepneys.
Sigun pa sa ahensiya, pighahagad kan transport groups na magin permanente an P1 provisional increase kan taong-2023.
Mawot man kan petitioners na madugangan an lambang dugang na kilometro makalihis an 4-kilometer charge sa minimum fare.
