NAGA CITY- Pigsierto kan sarong EASTTODA Presidente sa siyudad nin Naga na padagos an saiyang pag-asikaso asin pagbabantay sa saindang pag-iriba sa federasyon ngunyan na holiday season.
Sa entrevista kan Bombo Radyo Naga ki Romeo Briones Jr, EASTTODA President, sinaysay kaini na marhay man an nagigin trato kan mga tricycle driver sa mga pasahero na nag-aabot sa siyudad.
Sigun pa sa opisyal, yaon an saindang pagpapagirumdom na dae magin mapang-abuso ngunyan na igwang dakulang kasiributan partikular sa pagsingil nin mahal na pamasahe.
Kun kaya sa mga nakakaeksperyensiya soboot kan siring na pang-aabuso an tolos na ipaabot sa saindang opisina tanganing magibuhan nin magkakanigong lakdang.
Dugang pa ni Briones, yaon pa an saindang pagtaong abiso sa mga driver na enkaso igwang mawalat na gamit kan mga pasahero an tolos na ibalik ini tanganing dae magkaproblema asin dae madanyaran an saindang mga pangaran.
Importante soboot na pirmeng honesto an mga tricycle driver huli ta ikakarahay ninda ini asin kan mga pasahero.
Sa ngunyan, pigsierto na sana ni Briones na dae sinda mapabaya asin padagos na namomonitor an hiro kan saindang pag-iriba sa federasyon para sa mas salbado asin matuninong na kapaskuhan.
