NAGA CITY – Mayong nairehistrong nasawi sa siyudad nin Naga makalihis an pananalasa ni Bagyong Uwan.
Sa entrevista kan Bombo Radyo Naga ki Naga City Mayor Leni Robredo, pigsaysay kaining nagin epektibo an apat na bulan na paglilinig kan mga drainage asin iba pang agihan kan mga tubig alagad may mga parte man kan siyudad, marekas man ining naghupa.
Napag-araman kan mga opisyal na may nagkapirang lugar pa man na problema huli sa padagos na pagbaha, na boot sabihon kaipuhan pang tutukan.
Kasubago nin pagkaaga, an mga parteng binaha nagpoon na an paghupa kaya pinuunan na man an clearing operations kun saen pinangenutan mismo ni Naga City Mayor Leni Robredo na enot naman nangapudan para sa mga volunteers na magtabang tanganing maibwelta sa normal an gabos.
An Bagyong Uwan igwang kairibang makusog na duros, kaya naapektaran an mga evacuation center.Tulong evacuation center an linaog kan tubig huli sa makusog na bulos kan uras asin duros.
Siring man, nagin maayos an proseso kan paglikas asin obheto kan siyudad na orog pang sa madaling panahon malinig na an mga lugar, apwera sa mga parte na may tubig baha paman liwat.
Mientrastanto, nagpakol sa 6,000 pamilya na pigbibilog kan 20,000 na katao, an nasa evacuation center.
An iba sa sainda nakabwelta na sa saindang istaran apwera sa mga lugar na may kaipuhan pang ayuson.
Sa ngunyan, puspusan pa man an piggigibong pagtrabaho kan opisina sa siyudad tanganing mabwelta na an suplay kan kuryente sa gabos.
