Nangapudan si Senator Risa Hontiveros sa gobyerno na pagpreparan na an posibleng pagbweltada sa nasyon kan mga Filipino immigrants gikan sa Estados Unidos.
Dara man kaini, ini an kasuguan kan Trump administration na i-deport an mga illegal immigrants sa US. Ipinunto ni Hontiveros na may obligasyon an gobyerno na protehiran an gabos nin mga Pilipino saen man na panig kan kinaban asin andam na akuon asin suportaran sinda sa pagbabalik-nasyon.
Nangapudan man an lehislador sa embahada kan Pilipinas sa Estados Unidos asin sa mga konsulado na pagtalaan nin bastanteng budget an repatriation kan mga kababayan sa irarom kan Department of Foreign Affairs (DFA) asin Department of Migrant Workers (DMW).
Nag apelar si Hontiveros sa gobyerno na dae pabayaan an mga kababayang naiipit sa immigrant crackdown sa Amerika asin man tabangan sinda na ihurot an saindang karapatan magin man an mga remedyo na pwedeng gibuhon sa irarom kan US immigration laws.
