NAGA CITY- Padagos an pagpapangapudan kan Barangay Pacol sa saindang mga residentes na maglikay orog na ngunyan na igwang nakakaulakit na helang an influenza-like illness.
Sa entrevista kan Bombo Radyo Naga ki Jerry Aspe, Barangay Kagawad kan Barangay Pacol, Naga City, sinaysay kaini na huli sa pabago-bagong kamugtakan kan panahon kun kaya nauuso an kalintura, abo, sipon orog na sa mga kaakian.
Katakod digde, sigun sa opisyal padagos man an saindang pananao nin bulong sa mga nangangaipuhang konstituewentes alagad nahahadit sinda na posibleng maputol an saindang suplay.
Paliwanag ni Aspe huli sa limitadong budget kan saindang barangay dae gabos an matatawan kan saindang hinahagad na bulong.
Alagad gagamiton man an available na pondo tanganing liwat na magbakal kan mga kaipuhan na bulong.
Mientrastanto, an mga Barangay Health workers, zone assigned iyong naatasan na mag monitor orog na sa mga kaakian tanganing tolos na madarahan nin tabang an nangangaipuhan.
Sa ngunyan, pig-asegurar na sana kan opisyal na padagos an saindang ginigibong lakdang tanganing masimbagan an gabos na pangangaipuhan kan publiko sa presente.
