Nagbilog na an Philippine National Police nin sarong task group na iyong ma-imbestigar sa kaso kan pananambang sa sarong election supervisor sa probinsiya kan Sulu.
Sigun ki PNP spokesperson Police Brigadier General Jean Fajardo, an nasambitan ng grupo an igwang mandato na magtutok sa kasong ini.
Marurumduman, pinauranan nin bala kan badil an lunadan ni Sulu election supervisor Julie Vidzfar mantang pauli ini sa saindang harong.
Ligtas an opisyal alagad dae nakaligtas an saiyang tugang na sakay man kan parehong lunadan.
Pigpuonan na man kan Pambansang Pulisya an back tracking sa mga CCTV footage tanganing mabisto an may sala sa madugong pambabadil.
