Nanindugan si acting Philippine National Police (PNP) chief Lt. Gen. Jose Melencio Nartatez Jr. na tungkulin kan pulisya na magtalima o magsunod sa mga panundunang pigpapautob kan National Police Commission (Napolcom).
Ini an nagin kasimbagan kan heneral kan mahapot dapit sa impluwensiya o pape kan komisyon sa pambansang pulisya.
Sigun ki Nartatez, igwang malinaw na mandato an Napolcom na pamayuhan an PNP, asin magkaigwa nin operational supervision sa police organization.
Igwa man soboot administrative control an komisyon sa pambansang pulisya na dapat sunudon an pamayuhan. Hurot kan heneral, an Napolcom an nagsisirbing watchdog kan PNP asin igwang karapatan ining panimbagan an mga pulis asin bantayan an aksiyon kan mga ini komo gabay sa police force.
Nahapot man an heneral dapit sa posibleng pagsalungaw kan Napolcom sa kasuguan kaini komo OIC kan PNP.
Simbag kaini, dapat pirming magsirbing giya an mga panundonang pigluluwas asin pigpapautob kan komisyon sa saiyang mga magigin desisyon.
An Chief PNP, nagsisirbi komo ex-officio member kan Napolcom Board.
Sa siring na sistema, nagkakaigwa nin direktang koneksiyon sa tahaw kan police organization asin kan nasambitan ng komisyon.
Kaibahan kaini sa Board an lima sa mga regular commissioner na ina-appoint kan Napolcom asin an sekretaryo kan Department of the Interior and Local Government na nagsisirbi komo Chairman of the Board.
