Piglinaw kan National Bureau of Investigation (NBI) na pwedeng maghali an contractor na si Sarah Discaya sa saindang opisina huli ta mayo pang pigluluwas na warrant of arrest kontra sa saiya.
Sigun ki Acting NBI Director Angelito Magno, mayo sindang legal na basehan tanganing pugolan si Discaya hasta mayong kasugoam gikan sa korte.
Nilinaw man ni Magno na nagtitinir si Discaya sa NBI asin tulos na ipapautob an warrant enkaso iisyu na ini kan korte.
Marurumdumang, kusang nagsuko si Discaya kan nakalihis na semana makalihis ihayag ni Presidente Ferdinand Marcos Jr. na piglalaomang maluwas nin warrant katakod kan mga anomalya sa flood control projects.
Alagad ipinaliwanag kan kampo ni Discaya na an pagsuko kaini an sarong legal na paagi asin bakong pag-ako kan kasalan.
Enot digde, si Discaya kaibahan an siyam na iba pa an nahahampang sa mga kasong malversation asin pagbalgar sa Anti-Graft and Corrupt Practices Act katakod kan soboot P96.5 milyonh ghost flood control project sa Davao Occidental.
