NAGA CITY- Padagos an pag-enkaminar kan Social Hygiene Clinic sa siyudad nin Naga sa publiko na magpa-test para sa helang na HIV.
Sa entrevista kan Bombo Radyo Naga ki Grace Guevarra, head kan Social Hygiene Clinic, sinaysay kaini na an saindang goal sa presente an ma-enkaminar an publiko sa pig-aapod na early detection.
Sigun ki Guevarra mas marhay na amay pa sana magpa-test na tanganing mabulong man ini sa orog na marekas na panahon orog na sa mga aktibo an saindang sexual life.
Komo sarong health educators an contraceptives an nakakatabang tanganing malikayan an sexually transmitted disease na peligroso sa buhay kan mga tawo.
Importante soboot na magin bukas an kaisipan kan gabos sa siring na pag-urulay orog na ta parte na ini kan pagbabago sa komunidad.
Mientrastanto, igwa man nin pigkukundusir na seminars an saindang ahensiya para sa siring na urulay alagad sa presente huli sa pagbawas nin pondo dipisil na sa sainda na maubos gabos na barangay.
Alagad kun igwa man nin mga sponsors naisasagibo man an nasambitan ng seminars.
Sa ngunyan, pigsierto na sana ni Guevarra na igwa man bastanteng bulong an saindang opisina gikan sa DOH na makakatabang sa mangangaipuhan kaini.
