NAGA CITY- Hagad kan sarong paratukdo sa APAD Elementary School sa banwaan nin Ragay sa gobierno an two-storey building makalihis an naeksperyensiyahan na pagbaha.
Sigun ki Maricor Espadilla, paratukdo sa APAD Elementary School, prone sa pagbaha an kinamumugtakan kan saindang eskwelahan kun kaya tuyong nagbubulos an makusog na uran asin igwang bagyo pirme soboot piglalaog kan tubig-baha an saindang mga classroom.
An nasambitan ng pagbaha an nagigin rason sa pagkarot kan mga naipundar ng mga kagamitan o mga learning materials na dakulang pasanon para sa mga paratukdo asin estudyante.
Dugang pa ni Espadilla, kan nakalihis na aldaw huli sa epekto kan shearline nakaeksperyensiya nin pagbaha sa saindang eskwelahan alagad sa ngunyan bweltada naman sa klase an mga estudyante maski dae pa haros malinig an kapalibutan.
Pinagtarabangan soboot kan mga paratukdo na tolos na mapakarhay an mga classroom tanganing magin komportable an mga kaakian.
Alagad tuyong nagkakaigwa nin suspensyon nin klase, balik modules an mga estudyante tanganing makapadagos sana kan saindang pag-aadal.
Sa ngunyan, mawot na sana ni Espadilla na madangog an saindang pangapudan tanganing mabawasan an problema na saindang kinakahampang tuyong igwangh raot kan panahon o pag-uuran.
