NAGA CITY – Nakabali an barangay kan Dinaga, sa siyudad nin Naga sa mga nakasungkit nin prestihiyosong Seal of Good Local Governance for Barangay gikan sa Department of Interior and Local Government o DILG.
Sa entrevista kan Bombo Radyo Naga ki Ma. Cristina Intia, barangay kapitan kan nasambitan ng barangay, sinaysay kaini na labi an saindang nagin kaogmahan makalihis na mahiling an resulta kun saen nakabali an saindang barangay para sa nasambitan ng rekognasyon.
Sigun ki Intia, orgulyo kan saindang barangay na mapabali digdi, nin huli ta nasa labi 1,000 na mga barangay sa Camarines Sur an saro sinda sa mga natawan kan siring na pagbisto. An nasambitan naman na rekognasyon an bakong madali orog na ta kaipohan kaini nin kadakol na requirements.
Katakod kaini, ipapadagos man kan saindang barangay an marhay na paggogobernar.
Mientrastanto, tanganin man makabali digdi, an gabos na kategorya na pigtatao kan DILG an dapat mapasaran siring kan pagkakaigwa nin papels para sa gabos na plano, programa asin an pagigin transparency kan budget an maipautob sa barangay. Saro man an award na ini kan pagpapatotoo na marhay an saindang pagmamanehar.
Pigtawan-duon man kan opisyal na an saindang paglalapigot an bakong para sa saindang sadiri alagad para ini sa mga residente kan barangay. Ini man an ika-duwang pagkakataon na nakaresiber nin National award an saindang barangay.
Sa ngunyan, labi an pasasalamat kan kapitan sa gabos nin embwelto tanganing masungkit an prestihiyosong award.
