NAGA CITY- Padagos an pigkukundusir na trainings kan BFP-Naga sa mga residentes sa siyudad nin Naga maski tapos na an Fire Prevention Month kan nakalihis na bulan kan Marso.
Sa entrevista kan Bombo Radyo Naga ki SFO1 Arwin Yap, Fire Arson Lead Investigator kan Naga City Central Fire Station, sinaysay kaini na sa bilog na taon yaon an saindang mga pa-training asin seminars sa publiko tanganing matawan an mga ini nin impormasyon asin giya sa kun ano an gigibuhon sa panahon kan kasulo.
Katakod kaini, ngunyan na summer season yaon pa man giraray an saindang pagpapagirumdom sa mga tawo na sunudon an mga piglatag nindang panundon sa kun pano malilikayan an mga siring na insidente.
Siring na sana kan dae pagbaya sa pigluluto, paglikay sa Octopus connection na pwedeng pagpuonan kan faulty wiring na pwedeng paggikanan kan kasulo.
Pigsaysay pa kan opisyal na sa siyudad nin Naga nagkapira naman an nairehistrong kasulo ngunyan na taong 2025 na tolos man pigrespondehan kan mga bumbero.
Sa ngunyan, pig-enkaminar na sana ni Yap an publiko na magin responsable sa saindang mga kaharongan tanganing malikayan an orog pang paglangkaw sa kaso nin mga kasulo sa siyudad nin Naga.
