NAGA CITY- Mayo soboot nairehistrong firecracker-related injuries sa Brgy. San Felipe, Naga City sa kakatapos pa sanang selebrasyon kan Bagong taon.
Sa entrevista kan Bombo Radyo Naga ki Alfonso Rodriguez, Barangay Captain kan San Felipe, Naga City, sinaysay kaini na nagsunod man soboot sa mga regulasyon an saindang mga residentes kun kaya nalikayan an mga darakulang problema sa pagsabat kan New Year.
Sigun sa opisyal saindang ipinagbawal an paggamit nin paputok orog na an mga iligal asin makukusog nin huli ta an mga ini an pinaka primerong concern sa panahon kan pagselebrar nin Bagong taon.
Kasabay digde, pigsaysay man kan opisyal na igwang nakumpiskar na boga an saindang lado gikan sa mga menor de edad sa kasagsagan kan New Year celebration kun kaya saindang pinahigot an pagbabantay digde kan nakalihis na kasiributan.
Mientrastanto, sa pangkabilugan nagin matuninong asin matrayumpo man an pagselebrar kan bagong taon sa nasambitan ng lugar.
Sa ngunyan, mayo naman soboot nanunutaran na nagpapahabol pa sa pagpapaputok sa panduwang aldaw kan taong 2025.
