NAGA CITY- Pigkundusir sa Camarines Sur Police Provincial Office an Mass Oath-Taking asin Pinning Ranks 2nd Level Uniform Personnel CY2024 Regular Promotion Program.
Sa entrevista kan Bombo Radyo Naga ki PCPT. Liza Jane Alteza, PIO kan CSPPO, sinaysay kaini na igwang 11 Police Officer asin 278 na Police Non-Commissioned Officers an na-promote.
Sigun ki Alteza, taon-taon igwang pigkukundusir na mass promotion komo pagrekognisar sa dedikasyon kan saindang mga personahe sa paggampan sa saindang mga responsibilidad.
Dugang pa kan opisyal, paagi pa an nasambitan ng promotion tanganing mapalangkaw an moral kan mga kapulisan asin makapagpadagos sa saindang mga sinumpaan na responsabilidad.
Antes man na magin kwalipikado kaipuhan na igwa kan mandatory schooling asin training courses na required para sa promotion kan manlaen-laen na rango.
An nasambitan pa na promotion nangangaipuhan na pasado an nag-aaplay sa qualification exams, time-in-grade requirements, asin pagkumpleto sa accredited training programs.
Apwera digde an PNP nagrerekognisar man nin outstanding performance sa paagi kan mga medals asin awards.
Sa ngunyan, pigsierto na sana kan opisyal na padagos an saindang paglalapigot tanganing magin marhay pa an lado kan Pambansang Pulisya sa nasyon.
