NAGA CITY- Nagpaabot nin pasasalamat an Department of Labor and Employment Camarines Sur sa gabos na nakisumaro tanganing magin matrayumpo an pigkundusir na job fair para sa mga Persons with Dissability.
Sigun ki Ella Verano, pamayo kan DOLE Camarines Sur, an nasambitan ng aktibidad an maikokonsederar na special orog na ta pagpapahiling ini kan saindang suporta sa mga indibidwal na igwang kakundian.
Dugang pa kan opisyal, sar man ining opurtunidad tanganing matawan ni trabaho an mga Persons with Dissability komo selebrasyon kan Persons with Disability Month 2025 sa siyudad nin Naga.
An nasambitan ng job fair an nagin posible sa tabang kan Metro PESO, DOLE, sarong mall sa siyudad nin Naga na iyong nagserbeng venue siringman an nasa 16 na participating companies na iyong nagtangro nin trabaho sa mga PWD.
Marurumduman, an Job fair an kabali sa mga nakalinyadang events na pig-aprubahan ni Mayor Leni Robredo sa pagselebrar kan PWD Month.
Susog kaya sa Ordinance No. 2020-072 (PWD Code of Naga City) na kun saen an author iyo man si Councilor Elmer Baldemoro, an bulan kan July an pigdeklarar komo PWD Month sa siyudad nin Naga.
Sa ngunyan, pigsierto na sana ni Verano na padagos an saindang pakikipag-partnership sa manlaen-laen na opisina tanganing makapaghatod nin serbisyo sa mga mangangaipuhan kaini.
