NAGA CITY – Pig-apod na “barbaric” kan sarong paratukdo gikan sa Pili, Camarines Sur an piggibong pagpapasangaw sa gulong kan saiyang kotse mantang nakapark harani sa sarong hotel sa syudad nin Naga.
Sa entrevista kan Bombo Radyo Naga ki Josephine Montaña, Head Teacher kan La Purisima Pili National High School, sinaysay kaini na kan mag park soboot ini sa lugar igwa na nin nagpatanid saiya na “for tenants” sana an nasambitan ng parking slot.
Alagad, huli ta mayo pa man tenants sa edificio, nagsabi na sana ini na enkaso kaipuhan na halion an saiyang behikulo an pupwede man sindang dumanan sa hotel tanganing tolos ining mahali.
Alagad, mayo man soboot nin nag call up saiya kun kaya naglaom ini na mayo nin nagin problema, alagad kan pauli na ini digdi na kaini nahiling na flat na an apat na gulong kan saiyang behikulo magin kan mga pagtaraid kaini.
Dugang pa ni Montaña na tolos man ining naghapot-hapot sa mga tawo na yaraon sa lugar alagad magin an guard kan katampad na edificio an dae man nahiling kun sisay an kagibo kan nasambitan ng insidente.
Nagsabi man kuta an parking boy na nahiling kaini kun sisay an kagibo kaini alagad nahahandal soboot ini na magtaram asin itukdo an suspek. Huli digdi, nagpa blotter na si Montaña asin pigdumanan naman kan mga kapulisan an lugar tanganing mag-imbestigar alagad nagsayuma an kagsadiri kan edificio na magtao nin kopya kan CCTV camera.
Mientrastanto, kinaagahan sana igwa na naman nin nagkapirang behikulo na nakapark man sa lugar an flat naman an gabos na gulong. Katakod kaini, pangapudan na sana kan biktima na maaksyunan na an siring na mga insidente orog na ta dae ini makakatabang sa pagpapamarhay kan reputasyon kan syudad nin Naga.
