Pormal na nagsunad nin reklamo sa Department of Justice (DOJ) an legal counsel ni Mamamayang Liberal (ML) Party-List Rep. Leila de Lima na si Atty. Dino De Leon kontra sa mga prosecutor kaini.
Basado sa pigsumiter ni Atty. De Leon, reklamong Grave Misconduct asin Gross Ignorance of the Law an saindang pigsunad kontra sa 10 prosecutors.
Paliwanag kan abogado, hasta sa ngunyan kaya dae nag-uuntok an mga prosecutor sa paghahabol sa kaso ni Rep. De Lima maski pa naabswelto na ini asin na-dismiss na an kaso sa hukuman.
Apwera digde, pigsugo naman ninda Justice Secretary Crispin Remulla asin Prosecutor General Richard Fadullon sa paagi kan memorandum kan July 23 an mga prosecutor na i-withdraw o iatras na an Motion for Reconsideration na dating pigsunad kan DOJ.
Pigpaliwanag pa ni Atty. De Leon na mawot kaining maimbestigaran an mga prosecutor na soboot nag-abuso sa kapangyarihan.
Puon pa sana soboot ini kan lakdang sa lado ni Rep. De Lima kun saen mawot nindang panimbagon an mga nasa likod kun tano ini nakulong sa panahon kan Duterte administration.
